नवी मुंबई (प्रतिनिधी) भारतातील आघाडीची एसयूव्ही उत्पादक कंपनी महिंद्रा अँड महिंद्रा लिमिटेडने ‘एक्सयूव्ही ३एक्सओ झेडएनजी’ ही आपली पहिली सर्वसामान्य ग्राहकांसाठीची सीएनजीवर चालणारी प्रवासी एसयूव्ही बाजारात दाखल केली आहे. या गाडीची एक्स-शोरूम किंमत ९.९९ लाख रुपयांपासून सुरू होते. सीएनजीची किफायतशीरता, टर्बोचार्ज्ड इंजिनची दमदार कामगिरी आणि आधुनिक सुविधांचा संगम या गाडीच्या माध्यमातून साधण्यात आला आहे.
‘एक्सयूव्ही ३एक्सओ झेडएनजी’मध्ये टर्बोचार्ज्ड इंजिन देण्यात आले असून, सीएनजी आणि पेट्रोल या दोन्ही इंधनांवर हे इंजिन ८२ किलोवॅट शक्ती आणि २०० एनएम टॉर्क निर्माण करते. कंपनीच्या दाव्यानुसार, ही एसयूव्ही प्रति किलो सीएनजीमध्ये २४.७ किलोमीटरचे प्रमाणित मायलेज देते. त्यामुळे दमदार कामगिरीसोबतच इंधनावरील खर्च कमी करण्याचा पर्याय ग्राहकांना उपलब्ध झाला आहे.या एसयूव्हीमध्ये आकर्षक डिझाइन, प्रशस्त अंतर्गत जागा, आधुनिक तंत्रज्ञान, आरामदायी प्रवास आणि सुरक्षिततेवर भर देण्यात आला आहे. विशेष म्हणजे, सुरुवातीच्या प्रकारातही २६.०३ सेंटीमीटरची एचडी टचस्क्रीन, क्रूझ कंट्रोल, मागील प्रवाशांसाठी एसी व्हेंट्स आणि ६०:४० प्रमाणात विभागता येणारी मागील सीट अशा प्रीमियम सुविधा देण्यात आल्या आहेत.पहिल्यांदाच एसयूव्ही खरेदी करणाऱ्या ग्राहकांसह इंधनावरील खर्च कमी ठेवत शक्तिशाली इंजिन आणि आधुनिक सुविधांचा अनुभव घेऊ इच्छिणाऱ्यांसाठी ही गाडी आकर्षक पर्याय ठरण्याची अपेक्षा आहे. सीएनजीची बचत आणि एसयूव्ही चालवण्याचा आनंद यांचा समतोल साधण्याचा प्रयत्न कंपनीने या नव्या मॉडेलद्वारे केला आहे.
महिंद्रा अँड महिंद्रा लिमिटेडच्या ऑटोमोटिव्ह व्यवसायाचे अध्यक्ष डॉ. वेलुसामी आर. म्हणाले, “एक्सयूव्ही ३एक्सओ झेडएनजीचे वैशिष्ट्य म्हणजे कोणतीही तडजोड न करता उत्तम अनुभव देणे. आजच्या ग्राहकांना एसयूव्हीमधील प्रशस्त जागा, आधुनिक तंत्रज्ञान, सुरक्षितता आणि उत्तम ड्रायव्हिंगचा अनुभव हवा असतो. त्याचबरोबर सीएनजीमुळे इंधनावरील खर्चही कमी व्हावा, अशी त्यांची अपेक्षा असते. या गाडीत श्रेणीतील सर्वोत्तम टॉर्क, टर्बोचार्ज्ड इंजिनची कामगिरी आणि प्रभावी मायलेज यांचा संगम आहे. त्यामुळे सीएनजीची किफायतशीरता आणि एसयूव्ही चालवण्याचा आनंद या दोन्ही गोष्टी एकाच गाडीत मिळतात. सीएनजी एसयूव्हीकडून ग्राहकांच्या अपेक्षा पूर्ण करण्यासाठी ही गाडी नवा मापदंड ठरेल.